मुख्याध्यापक मनोगत
मुलांचा सर्वांगीण विकास घडविण्यासाठी आनंददायी, शिस्तबद्ध आणि भयमुक्त अशा वातावरणात दिलेले ज्ञान म्हणजे शिक्षण. बालमनावर या गोष्टीचा निश्चितच परिणाम जाणवतो. शाळेमध्ये येत असताना त्यास हवीहवीशी वाटणारी शाळा, शिक्षक व त्यांचे सवंगडी अर्थात वर्गातील विद्यार्थी, दैनंदिन कामकाज करतेवेळी असणारी प्रसन्नता हे विद्यार्थी यशाचे गमक आहे.
मुलाला सुसंस्कारित करणे आणि त्यातून उद्याचा सुजाण नागरिक घडविणे यात शाळेची महत्त्वाची भूमिका आहे. मुलांच्या जडणघडणीच्या या प्रवासात मुलाला लागेल तिथे मदतीचा हात देणे आणि सर्वांत महत्त्वाचे म्हणजे सजग राहणे, यात सर्वांचाच मोलाचा वाटा असावा असे मला वाटते.
विद्यार्थी–पालक–शिक्षक या त्रिकोणाकडे पाहिल्यावर प्रथम प्राधान्य निश्चितच विद्यार्थ्यास देणे आवश्यक वाटते. प्रत्येक मूल हे स्वतंत्र विचाराचे असते. त्याने काय व्हावे यापेक्षा त्याला काय करावयाचे आहे, आणि त्याच्या अंगी असणाऱ्या सुप्त गुणांचा विकास करणे हे ध्येय पालक व शिक्षकांनी अगोदर विचारात घेणे आवश्यक आहे.
“निर्मळ बुद्धी व निर्मळ हृदय याच्या बळावर भारतीय संस्कृती उभारण्यात आली आहे,” असे साने गुरुजींच्या लेखात आढळते. गुरुकुल पद्धतीने शिक्षणाबरोबर विद्यार्थ्यांना ध्यानधारणा, योगसाधना, अध्यात्मज्ञान, गुरुनिष्ठा आणि “आत्मा हाच परमेश्वर” समजून वागणारी पिढी तयार झाली तर एक सुजाण नागरिक तयार होईल. हाच मानस घेऊन आम्ही पुढील वाटचाल करीत आहोत.
