प्राचार्य मनोगत

श्री निरंजन गोरख डांगे

ओम गुरुदेव माध्यमिक व उच्च माध्यमिक गुरुकुल कोकमठाण.

प.पु.सद्गुरू आत्मा माऊलींच्या कृपाछत्राखाली सन १९९५ साली गुरुकुलाची मुहूर्तमेढ रोवली गेली. आधुनिक शिक्षणाला अध्यात्माची जोड देवून एक सुसंस्कारित पिढी घडविण्याचे कार्य गुरुकुलामध्ये मध्ये सुरु आहे. बघता बघता छोट्याशा रोपाचे रुपांतर आज एका विशाल वटवृक्षामध्ये झाले आहे. या वटवृक्षाच्या छत्रछायेमध्ये आजपर्यंत अनेक पक्षी येऊन विसावले व येथूनच जीवनासाठीची संजीवनी घेऊन मार्गस्थ झाले.

गुरुदेवांच्या कृपाछत्राखाली व व्यवस्थापन मंडळाच्या मार्गदर्शनाखाली गुरुकुल यशस्वीपणे गरुडझेप घेत आहे. ६४ विद्यार्थ्यासह सुरू झालेले हे माध्यमिक गुरुकुल आज २३०० विद्यार्थ्यापर्यंत पोहोचले आहे. आज सर्व ठिकाणी मराठी माध्यमासाठी विद्यार्थी संख्या टिकविणे अवघड होत असताना आपला विद्यार्थी संख्येचा आलेख मात्र वाढतो आहे.

आम्ही जरी मराठी माध्यमाचे गुरुकुल चालवत असलो तरी केवळ शिक्षणाचे माध्यम वगळता इतर सर्व गोष्टी ह्या इंग्रजी माध्यम किंवा सी. बी. एस. सी. च्या धर्तीवरती आहे. सर्व प्रकारच्या गुणवत्ता व सुविधा यासाठी आमची स्पर्धा ही मराठी माध्यमाच्या शाळेबरोबर नसून ती इंग्रजी माध्यम व सी.बी.एस.सी च्या शाळेबरोबरच आहे.

मराठी व सेमी इंग्रजी माध्यमाची अद्यावत सर्व सोयींनी परिपूर्ण व गुणवत्तेमध्ये अव्वल स्थान राखणारे गुरुकुल निर्माण करून मराठी व सेमी इंग्रजी माध्यमाच्या विद्यार्थ्यांनाही सर्व संधी निर्माण करून देणे हे गुरुकुलाचे महत्त्वाचे उद्दिष्ट आहे

आज आम्ही कला, क्रीडा, संगीत नृत्य, अभिनय स्पर्धा परीक्षा, शिष्यवृत्ती परीक्षा, सर्व परीक्षा या सर्व क्षेत्रात जिल्ह्यामध्ये अग्रणी आहोत याचा सार्थ अभिमान वाटतो.

प्राथमिक व माध्यमिक शिक्षण हे आपले मातृभाषेतूनच झाले पाहिजे तरच पुढील उच्च शिक्षणामध्ये व जीवनामध्ये ही मुले यशस्वी होतात हे अनेक शिक्षणतज्ञ व मानसशास्त्रज्ञानाचे मत आहे व त्यांचा अनुभव आम्हासही सातत्याने येतो. आज मराठी व सेमी इंग्रजी माध्यमामध्ये शिकलेले आमचे विद्यार्थी अनेक क्षेत्रांमध्ये यश शिखरे सर करत आहेत. या वाटचालीमध्ये आम्हाला पालकांचे अत्यंत मोलाचे सहकार्य लाभते आहे. त्याशिवाय असे चौफेर यश मिळवणे अशक्य आहे.

आधुनिक शिक्षणाबरोबरच प्रत्येकाला आपल्यामध्ये असलेल्या आत्मस्वरूपाची ओळख होणे म्हणजेच खरे शिक्षण आहे. सर्व देवांचा देव म्हणजे आत्मा हा प्रत्येकाच्या हृदयात स्थिर असतो व तो ध्यानाने प्राप्त होतो.

आत्मावर प्रेम करण्याची कला म्हणजे ध्यान व ज्याला ही जी साध्य झाली त्याला सदैव आत्म्याची साथ प्राप्त होते. सर्व देवांनी ज्याचे ध्यान केले तो आत्मा व त्याला जाणून घेणे जर बालवयातच शक्य झाले तर जीवनाचे सार्थक झाले आणि अशा आत्म्याला जाणून घेण्याचे काम विद्यार्थी गुरुकुलामध्ये राहून सातत्याने करतात व आपले आयुष्य सुखी समाधानी बनवितात.

गुरुकुलातील विद्यार्थ्यांच्या सर्वांगीण प्रगतीसाठी आम्ही कटिबंध आहोत. आपणास आम्ही गवाही देऊ इच्छितो की, आपल्या पाल्यास गुरुकुलमध्ये शिकविण्याचा आपण घेतलेला निर्णय हा नक्कीच योग्य आहे व त्याचे दूरगामी फायदे आपणास निश्चितच प्राप्त होतील.